ԱՄՆ հետախուզության հազարավոր աշխատակիցներ շուտով կարող են պաշտոնանկ արվել՝ ԱՄՆ կառավարության` պատվաստանյութի մանդատը չկատարելու համար, ինչի պատճառով հանրապետական օրենսդիրները մտահոգություն են հայտնել ազգային անվտանգության համար կարևոր գործակալություններից աշխատակիցներին հեռացնելու վերաբերյալ: Այս մասին գրում է Associated Press-ը։
Ընդհանուր առմամբ, հետախուզական անձնակազմի տոկոսը, ովքեր պատվաստվել են, ավելի բարձր է, քան ամերիկյան հանրության շրջանում, օրինակ՝ ԿՀՎ-ում 97%: Սակայն 18 գործակալություն կազմող հետախուզական համայնքում, որը բաղկացած է մոտավորապես 100.000 հոգուց, ըստ ԱՄՆ Յուտա նահանգի ներկայացուցիչ Քրիս Ստյուարտի ավելի ցածր տոկոսներ կան:
Վկայակոչելով տեղեկություններ, որոնք, ըստ նրա, տրամադրվել են Ներկայացուցիչների պալատի հետախուզության հանձնաժողովին, բայց չեն հրապարակվել՝ Ստյուարտն ասաց, որ մի քանի հետախուզական գործակալությունների աշխատակիցներ մինչև հոկտեմբերի վերջ առնվազն 20%-ը պատվաստված չի եղել: Որոշ գործակալություններում 40%-ը չպատվաստված է,- ասաց Ստյուարտը: Նա հրաժարվեց բացահայտել գործակալությունները, քանի որ պատվաստումների համամասնության վերաբերյալ ամբողջական տեղեկատվությունը գաղտնի էր:
Թեև շատ մարդիկ, հավանաբար, դեռևս պատվաստվելու են մինչև վարչակազմի սահմանած նոյեմբերի 22-ի վերջնաժամկետը, պարտադրանքի դեմ դիմադրությունը կարող է ազգային անվտանգության սպառնալիք դառնալ:
ԿՀՎ տնօրեն Ուիլյամ Բըրնսն անցած շաբաթ հրապարակայնորեն բացահայտեց, որ գործակալության սպաների 97%-ը պատվաստվել է: Ազգային հետախուզական գրասենյակի աշխատուժի ավելի քան 90%-ն է պատվաստված։
Ազգային հետախուզության տնօրենի գրասենյակը մերժել է հետախուզական համայնքի վերաբերյալ թվեր տրամադրել։ Գրասենյակը նաև չի ասում, թե ինչ արտակարգ իրավիճակների պլաններ կան այն դեպքում, եթե սպաները հեռացվեն աշխատանքից` պարտադրանքը չկատարելու պատճառով:
Ստյուարտը վարչակազմին կոչ է արել հաստատել բժշկական, կրոնական և այլ հիմքերով բացառությունները և հետաձգել հետախուզության աշխատակիցների ազատումները:
Ներկայացուցիչների պալատի հետախուզության հանձնաժողովի դեմոկրատ անդամներն ասում են, որ վստահ են, որ պատվաստումների պարտադրանքը խնդիր չի առաջացնի հետախուզական համայնքի համար: Ներկայացուցիչ Ջեյսոն Քրոունն ասաց, որ գործակալությունները «բավականին լավ» են գործում, և որ պատվաստումն աշխատողի պատրաստակամության նշան է:
«Եթե ինչ-որ մեկը պատրաստ չէ անել այն, ինչ անհրաժեշտ է սեփական առողջությունը և իր ստորաբաժանման առողջությունը պաշտպանելու համար, դա իրականում կասկածի տակ է դնում աշխատանքն արդյունավետորեն կատարելու նրա կարողությունը»,- ասել է Քրոուն հարցազրույցի ժամանակ։
Պատվաստման պարտադրանքը զգալի դիմադրության է բախվել: Բողոքի ձայն են բարձրացրել նաև արհմիությունները՝ պնդելով, որ պարտադրանքը սահմանափակում է մարդկանց ազատությունը։