Հայաստանը վեց ամսով երկարաձգել է Թուրքիայից ապրանքների ներմուծման արգելքը։ Այդ մասին կառավարության նիստում տեղեկացրել էկոնոմիկայի նախարարի պաշտոնակատար Վահան Քերոբյանը:
Արգելքն ուժի մեջ է մտել 2021 թվականի հունվարի 1-ից և ավարտվում էր հուլիսի 1-ին։ Այժմ այն երկարաձգվում է մինչև այս տարեվերջ: Կառավարության պարզաբանմամբ՝Հայաստանի իշխանությունները երկարաձգում են արգելքը՝ Եվրասիական տնտեսական միության պահանջներին համապատասխանելու համար։ Համաձայն «Եվրասիական տնտեսական միության մասին» պայմանագրի 7-րդ հավելվածի 54-րդ կետի, ԵԱՏՄ անդամներից մեկը, առանց մյուսների հետ համաձայնության, չի կարող արգելել երրորդ երկրներից ներմուծումն ավելի քան վեց ամիս:
Վահան Քերոբյանը նշել է, որ իր ղեկավարած գերատեսչության գնահատմամբ՝ Թուրքիայից ներմուծումը կրճատվել է շուրջ 70% -ով և այժմ հիմնականում ներկրում են միայն հումք և շինանյութեր, տրիկոտաժե գործվածքներ (տեղական տեքստիլ գործարանների արտադրության համար), ինչպես նաև կաշի (կոշիկի արտադրության համար): Գրեթե պատրաստի ոչ մի արտադրանք չի ներմուծվում։
Հայաստանը 2020-ի հոկտեմբերին Արցախի հակամարտության գոտում ռազմական գործողությունների համապատկերում՝ Եվրասիական տնտեսական հանձնաժողովին (ԵՏՀ) առաջարկեց, որ Թուրքիան բացառվի ԵԱՏՄ սակագնային նախապատվությունների միասնական համակարգի օգտագործողների ցուցակից: Հոկտեմբերի 20-ին ՀՀ կառավարությունը որոշում կայացրեց 2021 թվականի հունվարի 1-ից Թուրքիայից ապրանքների ժամանակավոր արգելքի մասին (վեց ամսով): Թուրքական ապրանքների ներմուծման սահմանափակումն առաջին հերթին հետապնդում է երկրի քաղաքացիների անվտանգության ապահովումը, հաշվի առնելով բազմիցս հաստատված փաստերն այն մասին, որ Թուրքիան «բացահայտորեն աջակցում է Արցախի դեմ ռազմական և ահաբեկչական գործողություններին»,- նշվում է բանաձևում: Նշվել է նաև, որ այդ կերպ դադարեցվում է Թուրքիայի բյուջեի ֆինանսավորումը Հայաստանի միջոցներից, ինչպես նաև ճնշում է գործադրվում Թուրքիայի հնարավոր սպառնալիքների դեմ`կապված թշնամական երկրից տեղական շուկա ապրանքների մատակարարման հետ: Վերջին տարիներին Թուրքիայից Հայաստան տարեկան ներմուծման ծավալն ըստ արժեքի՝ տատանվում էր 250 մլն դոլար սահմանագծի վրա՝ թեպետ 1993-ին Անկարան միակողմանի փակել էր Հայաստանի հետ ունեցած ցամաքային սահմանը։