Բելառուսի նախագահը նամակով դիմել է ՄԱԿ-ի գլխավոր քարտուղար Անտոնիո Գուտերեշին
Միայն մարելով առճակատման օջախը, մենք կկարողանանք սկսել նոր հետկոնֆլիկտային աշխարհակարգի կառուցումը, որտեղ հաշվի կառնվեն բոլոր պետությունների շահերը։ Այս մասին Լուկաշենկոն հայտարարել է ՄԱԿ-ի գլխավոր քարտուղար Անտոնիո Գուտերեշին ուղղված նամակում, հայտնում է BelTA-ն։
«Մենք ագրեսոր չենք, ինչպես մեզ փորձում են ներկայացնել որոշ երկրներ։ Բելառուսը երբեք չի եղել պատերազմների կամ հակամարտությունների նախաձեռնող։ Եվ մենք դավաճան չենք։ Մեզ համար կարևոր է ազնվությունը հարաբերություններում: Մեր դիրքորոշումն այն է, որ ցանկացած երկրի մտահոգություններն ու շահերը՝ լինի դա ցամաքային զանգվածի մեկ ութերորդը, թե կղզի ազգ, պետք է լսելի լինեն բոլորի կողմից։ Այդ իսկ պատճառով Բելառուսն անկեղծորեն և մշտապես հավատարիմ է մնում շուտափույթ հաշտեցման գործին»,- ասվում է նամակում։
Լուկաշենկոն հիշեցրել է, որ ինքը բազմիցս ուշադրություն է հրավիրել «գլոբալ և եվրոպական տարածաշրջանային անվտանգության համակարգերի դեգրադացիայի վրա», իրեն չեն լսել։ «Եվրոպայում անվտանգության ճարտարապետությունը ձախողվել է։ Արևմտյան երկրների՝ ընդհանուր և անբաժանելի անվտանգության ամրապնդման վրա աշխատել չցանկանալը, օրինական շահերի նկատմամբ նրանց անհարգալից վերաբերմունքը և մյուս գործընկերների, առաջին հերթին Ռուսաստանի, մտահոգություններն անտեսելը սկզբում հանգեցրեց առևտրային, տնտեսական և տեղեկատվական պատերազմների, այնուհետև հրահրեց թեժ հակամարտություն Ուկրաինայի տարածքում»,- ասել է նա։
Լուկաշենկոն հիշեցրել է 2014-2015 թվականներին Ուկրաինայի արևելյան հակամարտության կարգավորմանն ուղղված Բելառուսի ջանքերը, որոնց արդյունքում ստորագրվել են մինսկյան հայտնի համաձայնագրերը։ «Այս պահին յուրաքանչյուր ողջամիտ մարդ և քաղաքական գործիչ պետք է մտածի ոչ թե իր շահի և հնարավոր դիվիդենտների, այլ խաղաղության շուտափույթ հասունացման մասին այնպիսի պայմաններով, որոնք ընդունելի կլինեն հակամարտության բոլոր կողմերի համար», — ասել է Բելառուսի ղեկավարը։