Փելոսին դարձել է ԱՄՆ Կոնգրեսի պալատի առաջին խոսնակն,
ով այցելել է Թայվան վերջին 25 տարվա ընթացքում։
Ինքնաթիռը, դեպի կղզի ուղիղ երթուղու փոխարեն, օդ է բարձրացել Մալայզիայի մայրաքաղաք Կուալա Լումպուրից, թռչել Ինդոնեզիայի օդային տարածքով, այնուհետև Ֆիլիպինների արևելք և Խաղաղ օվկիանոսից վայրէջք կատարել Թայվանում։
Այսպիսով, նա շրջանցել է Հարավչինական ծովի վերևում գտնվող տարածությունը, որտեղ առաջադրանքներ են կատարում չինական երկու ավիակիրները՝ «Շանդունը» և «Լյաոնինգը»։
Թայվանից հարավ-արևելք գտնվում է ավիակիր հարվածային խումբը, որը գլխավորում է միջուկային էներգիայով աշխատող ավիակիր USS Ronald Reagan-ը։
Չինաստանի և ԱՄՆ-ի միջև հարաբերությունները սրվեցին հուլիսի երկրորդ կեսին այն բանից հետո, երբ տեղեկություններ էին ստացվել, որ ասիական շրջագայության ընթացքում Փելոսին պատրաստվում է այցելել Թայվան։
Նրա պաշտոնական գրաֆիկում այցը կղզի նշված չէր, սպասվում էր, որ նա կայցելի Մալայզիա, Սինգապուր, Ճապոնիա և Հարավային Կորեա:
Չինաստանի արտաքին գործերի նախարարությունը հայտարարել է, որ չինական զորքերը «ձեռքերը ծալած չեն նստի», եթե Փելոսին այցելի Թայվան։ Գերատեսչությունը ևս մեկ անգամ նշել է, որ «ամերիկյան իշխանությունների երրորդ պաշտոնյայի» (նախագահից և փոխնախագահից հետո) այցը Թայվան, որը Չինաստանից իր անկախությունը հռչակեց 1949 թվականին, «կհանգեցնի ահավոր քաղաքական ազդեցության» (Պեկինը շարունակում է Թայվանը համարել իր նահանգը):