Գիտնականները նշել են, թե որքան ժամանակ կարող են մարդու օրգանիզմում պահպանվել կորոնավիրուսի դեմ հակամարմինները: Այս մասին հաղորդում է Բարսելոնայի գլոբալ առողջության ինստիտուտն (ISGlobal)` իր պաշտոնական կայքում:
Հետազոտության համաձայն` IgG հակամարմինների մակարդակը մնում է կայուն կամ նույնիսկ աճում է վարակվելուց յոթ ամիս անց:
Փորձագետները նշում են, որ մարդկանց 75 տոկոսի մոտ, հիվանդության սկսվելուց հինգ ամիս անց, նկատվել է հակամարմինների աճ` առանց կորոնավիրուսով կրկնակի վարակման։
Մասնագետները պարզել են նաև, որ այս հակամարմիններն ապահովում են խաչաձև իմունիտետ, այսինքն` պաշտպանում են նաև կորոնավիրուսի այլ շտամերից։
Ավելի վաղ, Նովոսիբիրսկի պետական համալսարանի բնական գիտությունների ֆակուլտետի կենսատեխնոլոգիայի և վիրուսաբանության լաբորատորիայի ղեկավար, կենսաբանական գիտությունների դոկտոր, պրոֆեսոր, Ռուսաստանի գիտությունների ակադեմիայի թղթակից անդամ Սերգեյ Նետեսովը նշել էր կորոնավիրուսից բջջային իմունիտետի պահպանման ժամկետը: Նա ասել էր, որ պատվաստումից կամ հիվանդությունից հետո իմունիտետը պահպանվում է շուրջ վեց ամիս: