Թեհրանում մեկնարկել է Ռուսաստանի նախագահ Պուտինի և Թուրքիայի նախագահ Էրդողանի հանդիպումը
Հանդիպման սկզբում ՌԴ ղեկավարը շնորհակալություն է հայտնել Էրդողանին ուկրաինական հացահատիկի արտահանման խնդրի լուծմանն ուղղված ջանքերի համար։ «Ուզում եմ շնորհակալություն հայտնել Ձեր միջնորդական ջանքերի համար՝ պարենային հարցերի շուրջ բանակցությունների, Սև ծովով հացահատիկի արտահանման խնդիրների շուրջ հարթակ տրամադրելու համար։ Ձեր միջնորդությամբ մենք առաջ ենք շարժվել։ Սակայն ոչ բոլոր հարցերն են լուծվել։ Բայց այն, ինչ ունենք, արդեն լավ է»,- ամփոփել է ՌԴ նախագահը։
Ավելի վաղ հայտնի էր դարձել, որ Թեհրան կատարած պաշտոնական այցի ընթացքում Վլադիմիր Պուտինը հանդիպել է Իրանի նախագահի և հոգևոր առաջնորդի հետ։ Պետությունների ղեկավարները քննարկել են միջազգային անվտանգության ամրապնդման նպատակով երկկողմ ռազմավարական համագործակցության հարցեր։ Ռուսաստանի ղեկավարն ընդգծել է, որ իրենց համատեղ ջանքերը մեծ ներդրում ունեն սիրիական հակամարտության կարգավորման գործում։