«Ֆլայ Լաբ» թռչող սարքերի արհեստանոցները հիմնադրվել են 2016 թվականին՝ ապրիլյան քառօրյա պատերազմի պատճառներն ու հետևանքներն ուսումնասիրելու արդյունքում։
Արհեստանոցները գործում են «Միտ» կրթական, ինժեներական և փորձարարական կենտրոն» ՀԿ-ի կազմում։ Այստեղ մի հարկի տակ են հավաքվել պրոֆեսիոնալ ինժեներները, IT ոլորտի մասնագետները, կամավորականները, դպրոցականները։ Գործունեության նպատակն է պատանիների և երիտասարդների համար ստեղծել աշխատանքային-փորձարարական կենտրոն, որտեղ հաճախողները սովորում են պատրաստել սավառնակներ և ռադիոկառավարվող թռչող սարքեր։
Արհեստանոցներում հնարավորություն է տրվում օգտվել առկա բոլոր տեսակի հաստոցներից, գործիքներից և սարքավորումներից (CNC, 3D printer, խառատային հաստոց, շաղափային հաստոց և այլն), ինչպես նաև կիրառվում են բազմազան նյութեր (կոմպոզիտային նյութեր, տարբեր տեսակի փայտեր, սոսինձներ, մետաղներ և այլն)։ Մասնաճյուղեր կան Գյումրիում (գլխամաս), Երևանում (մասնաճյուղ) և Վանաձորում (մասնաճյուղ), որտեղ ընդհանուր առմամբ ուսանում են շուրջ 100 սան` սկսած 10 տարեկանից։ Դասերն անց են կացվում շաբաթական 2 օր 2-ական ժամով յուրաքանչյուր խմբի համար, պարբերաբար իրականացվում են դաշտային պարապմունքներ։ Ուսուցումն իրականացվում է կոնկրետ կրթակարգով (նախատեսված է 1 տարվա համար), որի վերջնարդյունքում սաները կարողանում են ինքնուրույն պատրաստել և կառավարել ռադիոկառավարվող թևավոր մոդելներ։
Հաստոցները, աշխատանքային նյութերը ձեռք են բերվում հիմնադիրների միջոցներով, սաների կողմից տրվող վարձավճարներով, նվիրատվություններով, ինչպես նաև ՀԿ-ի կողմից մատուցված ծառայություններից ստացված գումարներով։
«Ֆլայ Լաբ»-ի հետ կարող եք կապ հաստատել հետևյալ հեռախոսահամարներով՝ +37498346321, +37493566818, էլ․ փոստով՝ ngo.mitcenture@gmail.com կամ Facebook` https://www.facebook.com/flylabYerevan:
ՄԻԱՍԻՆ ՊԱՇՏՊԱՆԵՆՔ ՄԵՐ ԵՐԿԻՆՔԸ։ ԴԱՌՆԱՆՔ ՎՏԱՆԳԱՎՈՐ ՈՒ ԱՆԽՈՑԵԼԻ ԹՇՆԱՄՈՒ ՀԱՄԱՐ (խմբ.)։