Թուրքիայի նախագահ Ռեջեբ Թաիփ Էրդողանը ներկայացրել է պայմաններ՝ Թուրքիայի և Հայաստանի հարաբերությունները կարգավորելու համար։ Նրա խոսքով, նախ՝ անհրաժեշտ է վերականգնել Հայաստանի և Ադրբեջանի հարաբերությունները։
«Ադրբեջանի և Հայաստանի հիմնախնդիրների կարգավորման ընթացքում մենք ևս համապատասխան քայլեր կձեռնարկենք։ Մի հաշվեք Հայաստանի օգուտները թուրքական սահմանների բացումից հետո»,- ասել է Էրդողանը՝ ելույթ ունենալով Ադրբեջանի խորհրդարանում։ Նրա ելույթը հեռարձակվել է TRT հեռուստաալիքով։
Հիշեցնենք, որ Թուրքիայի և Հայաստանի միջև բացակայում են դիվանագիտական հարաբերությունները, երկու երկրների միջև սահմանը փակվել է 1993 թվականից։
Էրդողանը նաև նշել է, որ Արցախի հակամարտության հանգուցալուծումը հնարավորություններ է ստեղծում տարածաշրջանի բոլոր երկրների, այդ թվում նաեւ Հայաստանի համար։ Թուրք ղեկավարի խոսքով՝ Անկարան պատրաստ է Բաքվի հետ համատեղ ամբողջովին վերականգնել Արցախը։
Նախօրեին տեղեկացվել է, որ Ադրբեջանի և Թուրքիայի ղեկավարները հռչակագիր են ստորագրել՝ միութենական հարաբերությունների մասին։ Ալիևը այն պատմական նշանակալի իրադարձություն է համարել, քանի որ համաձայնագիրը վերաբերում է բոլոր ուղղությունների՝ երկուստեք համագործակցությանը, որոնց թվում՝ պաշտպանության։