Չբարձրաձայնել այլեւս չի ստացվում. Ալբերտ Հովհաննիսյանի հայր

Հարգելի’ մի բուռ հայություն, չբարձրաձայնել այլեւս չի ստացվում,- իր ֆեյսբուքյան էջում գրում է Արցախյան երկրորդ պատերազմում անմահացած հերոս Ալբերտ Հովհաննիսյանի հայրը։

 — Թվում էր, թե արցախյան երեք հերոսամարտերի զոհերի հիշատակին նվիրված հուշակոթող կառուցելու գաղափարը ոգեւորությամբ էր ընդունվել բոլորի կողմից, սակայն, որոշ շրջանակներում անմիջապես դժգոհության ալիք բարձրացրեց որդուս’ Ալբերտի հավաքական կերպարի ընտրությունը` որպես այդ եռակոթողում արցախյան երրորդ պատերազմը մարմնավորող անձ։ Այն որակավորվեց որպես կողմնակալ վերաբերմունք, մեղադրական եւ չարամիտ խոսակցություններ հասցեագրվեցին ինձ, գրավոր բողոքներ ուղղվեցին համապատասխան կառույցներ։ Նախորդ օրերին էլ հերոսածին մի խումբ մայրեր, իրենց ակնհայտ անհամաձայնությամբ քննարկումներ ծավալեցին ինձ հետ’ հուշակոթողում Ալբերտի կերպարի ընտրությունը կրկին անգամ վիճարկելով։ Ու Ալբերտի մայրը, ով երբեք չէր միջամտում այս գործընթացներին, խնդրահարույց այս հանգամանքներում գուցե էմոցիոնալ որոշում է կայացրել, բայց խիստ դեմ է Ալբերտին այդ հուշարձանում ներառելուն։

Հավատացեք, իմ ու ձեր տղաները, կնախընտրեին իրենց նորաթուխ կյանքում` նոր ծիլ տված երազանքները հանուն հայրենիքի ծառայեցնել ողջերի շարքում, իրենց ընտանիքների կողքին, իսկ այս լուսանկարի պատմությունը, հերոսացում` կորստի ցավը երբեք չի էլ սփոփելու։ Բայց, մրցակցության վերածված դժգոհությունների այս քաոսում ամեն անգամ շահարկելով որդուս անունը, կոտրվում է մի բան, որը կոտրվելու տեղ ախր է’լ չունի։