Ուկրաինայի անվտանգության ծառայության կիբերանվտանգության բաժնի ղեկավար Իլյա Վիտյուկը աղետ է անվանել ուկրաինական խոշորագույն Kyivstar բջջային օպերատորի համակարգչային համակարգի վրա հաքերների հարձակումը։ Նրա խոսքով, այն «ոչնչացրել է գրեթե ամեն ինչ, ներառյալ հազարավոր վիրտուալ սերվերներ և համակարգիչներ»:
Այս պահին մենք կարող ենք վստահորեն ասել, որ նրանք [հաքերները] գտնվում են [Kyivstar] համակարգում առնվազն 2023 թվականի մայիսից։ Հիմա չեմ կարող ասել, թե երբվանից ունեին լիարժեք մուտք դեպի համակարգ, հավանաբար` նոյեմբերից, ասել է Վիտյուկը։
Ինչպե՞ս է ազդել կիբերհարձակումը Ուկրաինայի զինված ուժերի վրա.
Վիտյուկի խոսքով՝ միջադեպը քիչ ազդեցություն է ունեցել ուկրաինական բանակի վրա, քանի որ զինվորականներն օգտագործում են կապի այլ համակարգեր՝ «այլ ալգորիթմներ և արձանագրություններ»։ Դա չի խանգարել նաև հակաօդային պաշտպանության համակարգին, պարզաբանել է նա։
Եթե խոսենք անօդաչու թռչող սարքերի հայտնաբերման, հրթիռների հայտնաբերման մասին, ապա, բարեբախտաբար, այս իրավիճակը մեզ վրա առանձնապես չազդեց.
Կիբերանվտանգության բաժնի ղեկավարն ասել է, որ հարձակման նպատակը «հոգեբանական հարված» հասցնելն էր։ Բացի այդ, ընդգծել է Վիտյուկը, դա դարձել է «նախազգուշացում», որ ոչ ոք չի կարող հույս դնել անձեռնմխելիության վրա։