«ԿԵՐԱՄԱ ՄԱՐԱՑԻԻ» ՇՈՒՐՋ ՆՈՐ ՍԿԱՆԴԱԼ Է ՀԱՍՈՒՆԱՆՈՒՄ
Newsmedia.am-ը հերթական անգամ անդրադարձել է «Կերամա Մարացի» ընկերության սեփականատիրոջ շուրջ հյուսվող աղմկահարույց դրվագներին: Դրանցից թերևս ամենահայտնին ընկերության խանութի պահեստում քաղաքացի Ա. Գյուրջյանի խոշտանգումն էր։
Լրատվական կայքը մեջբերել է նախօրեին ՌՈ նախկին աշխատակից Վարդան Ղուկասյանի կողմից կատարված հերթական բացահայտումը, ըստ որի ընկերության համասեփականատեր Անդրանիկ Գասպարյանը սերտ հարաբերությունների մեջ է օրենքով գող Սուրեն Ավետիսյանի` Լենինականցի Սուրոյի հետ եւ, որ հենց գողական աշխարհն է նպաստում վերջիններիս անխափան ու անվարան գործունեությանը՝ հատկապես մարդկանց հետ ամենատարբեր բնույթի հարցեր լուծելու ճանապարհին:
Newsmedia.am.-ը հավատարիմ մնալով իր որդեգրած գործելաոճին` այն է ցանկացած խնդիր ներկայացնել օբյեկտիվորեն՝լսելով բոլոր կողմերի տեսակետն ու դիտարկումները դիմեց անձամբ «Կերամա Մարացիի» սեփականատեր Անդրանիկ Գասպարյանին, ով դեռ հարցը մինչեւ վերջ չլսած արձագանքեց.
-Չգիտեմ ինչի համար եք զանգել, բայց ինչ ասում են էդպես չի:
-Բայց ախր սպասեք հարցը ավարտենք:
-Ես գիտեմ մի սուտ պետք է լինի:
—Սու՞տ է, որ Ձեր ընկերությունում մարդ են խոշտանգել, կա հարուցված քր. գործ:
-Դե դիմեք քննիչներին, ես ասելիք չունեմ: Ես տնօրենը չեմ:
-Բայց սեփականատերն եք:
-Հետո ինչ:
-Ձեզ չի՞ հետաքրքրում, թե ինչ է կատարվում Ձեր ընկերությունում:
-Ինձ քիչ է հետաքրքրում այդ ամենը, ով ինչ ուզում է, թող ասի:
-Իսկ, ինչպե՞ս է ստացվում, որ ամենատարբեր դրվագներով, մարդիկ բարձրաձայնում են ամենատարբեր տարաբնույթ արատավոր երեւույթների մասին, որոնք անուղղակիորեն կապվում են Ձեր եւ Ձեր ղեկավարած ընկերության հետ: Ի՞նչ կասեք սրա վերաբերյալ:
-Ես ինչ անեմ, թող խոսեն:
-Պարզաբանեք, ոչինչ մի արեք:
-Գնացեք իրավապահներից հարցրեք, թողեք ապրեմ:
-Ապրեք, բայց մեր աշխատանքին էլ մի խոչընդոտեք:
-Դուք մեկա գրելու եք էն ինչ ուզեք:
—Եթե նման կերպ վարվեինք, Ձեզ չէինք զանգահարի, մենք կողմ ենք օբյեկտիվ լրատվությանը, որքան էլ դա Ձեզ զարմանալի թվա:
-Դե ես ասեցի գնացեք իրավապահներից հարցրեք:
-Շատ լավ, իսկ ի՞նչ կասեք այն լուրերի վերաբերյալ, որ Դուք բավականին ջերմ հարաբերություների մեջ եք գողականների հետ, մասնավորապես օրենքով գող լենինականցի Սուրոյի հետ:
-Սխալ բաներ եք գրում ազիզ ջան, էլ մի զանգեք ինձ էդ հարցերով: