Հայաստանի և Ադրբեջանի միջև կա պետական սահման, քանի որ դեռ խորհրդային տարիներին երկու երկրների միջև եղել է սահման, որը սահմանազատված էր, իսկ 1991թ ԱՊՀ-ի ստեղծման մասին համաձայնագրով, որը վավերացվել է և Հայաստանի, և Ադրբեջանի խորհրդարանների կողմից, այդ սահմանները ճանաչվել են։ Այդ մասին, ըստ @armenpress-ի, Ազգային ժողովում խորհրդարանական ժամին ասել է ՀՀ վարչապետ Նիկոլ Փաշինյանը։
«Մենք կարծում ենք, որ այդ պայմանավորվածությունները պետք է իրականացվեն այս տրամաբանությամբ։ Միաժամանակ մենք պատրաստ ենք լսել այլ առաջարկներ, այլ գաղափարներ»,- ասել է վարչապետը։
Նիկոլ Փաշինյանի խոսքով՝ այս թեմայով բազմաթիվ անհիմն շահարկումներ կան, որ գյուղերն անպաշտպան են մնալու և այլն։
«Նման բան չկա, ավելին առաջարկների փաթեթում ամեն ինչ հաշվի է առնված։ Պետք է գիտակցենք նաև, որ մեր արած առաջարկը չի կարող 100 տոկոսով հարմար լինել Հայաստանին կամ անհարմար Ադրբեջանին։ Կա սահմանային գիծ, և մենք կարծում ենք, որ [զորքերի] դուրսբերումը պետք է լինի այդ սահմանագծով, մինչդեռ պետք է փաստել, որ դա չի կանխորոշում հետագա սահմանազատման արդյունքները, դա պետք է լինի համապատասխան բանակցությունների առարկա։ Կարծում եմ, որ այս առաջարկները հիմնված են օրինական և իրավական իրողությունների վրա»,- ասաց Փաշինյանը։
Նիկոլ Փաշինյանը կարևորել է այն հանգամանքը, որ խորհրդարանականների այս առաջարկների էությունը պետք է պատշաճ կերպով ներկայացվի միջազգային հանրությանը, քանի որ այս իրավիճակի ոչ ճիշտ մեկնաբանությունը կարող է օգտագործվել որոշ ուժերի կողմից՝ սահմանին նոր սրացում հրահրելու համար։
«Մեզ համար շատ կարևոր է ֆիքսել օրինական և իրավական իրողությունները, ամրագրել, որ կա այնպիսի արդյունավետ մեխանիզմ, որը կարող է կանխել հետագա էսկալացիան»,- եզրափակեց Փաշինյանը։