2020 թվականին Իսրայելը առաջնահերթության կարգով պատվաստանյութ ստացավ Pfizer լաբորատորիայից, որի փոխարեն Pfizer-ին տրամադրեց իր բնակչության համաճարակաբանական տվյալները։
Իսկ հիմա Իսրայելի Առողջապահության նախարարությունը դատարանում պնդում է, որ չի կարողացել գտնել Pfizer դեղագործական ընկերության հետ կնքված համաձայնագիրը՝ կապված կորոնավիրուսային պատվաստանյութերի վերաբերյալ համաճարակաբանական տեղեկատվության փոխանակման հետ, և նույնիսկ հայտարարել է, որ չգիտի, թե արդյո՞ք պայմանագիրը ստորագրված է, թե՞ ոչ։
Երուսաղեմի շրջանային դատարանում ներկայումս սպասվող միջնորդության մեջ Առողջապահության նախարարությունը խոստովանել է, որ թեև իրականացվել են լայնածավալ հետազոտություններ, սակայն Pfizer-ի հետ ստորագրված պատվաստանյութի համաձայնագիրը չի գտնվել: «Մենք ստորագրված պայմանագիր չենք գտել», — ասաց դատախազության փաստաբան Ահավա Բերմանը Առողջապահության նախարարության անունից: «Մենք խուզարկեցինք բոլոր վայրերը, ներառյալ գործադիր տնօրենի գրասենյակը և իրավաբանական բաժինը»:
Համաձայնագիրը հրապարակվեց 2021 թվականի հունվարին, սակայն դրա շատ կետեր այն ժամանակ թաքցվեցին հանրությունից: Հրապարակված համաձայնագրում տեղ էր թողնվել Առողջապահության նախարարության այն ժամանակվա գլխավոր տնօրեն Հեզի Լևիի և Pfizer-ից մեկ այլ անձի ստորագրությունների համար, ում անունը ծածկված էր, բայց նրանց ստորագրությունները դեռ չկային: Առողջապահության դեպարտամենտի` դատարանին ուղղված պատասխանում ասվում է, որ վարչությունը չգիտի` համաձայնագիրը ստորագրվե՞լ է, թե՞ ոչ:
Իսրայելում ավելի քան 6 միլիոն մարդ ստացել է Pfizer պատվաստանյութ։ Արդյո՞ք դրա փոխարեն նրանց վերաբերյալ տեղեկատվությունը փոխանցվել է պատվաստանյութ արտադրող ընկերությանը թե՞ ոչ, գուցե դատարանը կպարզի։