Թուրքիայի նախագահ Ռեջեփ Թայիփ Էրդողանը, ելույթ ունենալով ՄԱԿ-ի Գլխավոր ասամբլեայում, ասել է, որ իր երկիրը չի ճանաչում Ղրիմի բռնազավթումը։
Էրդողանը հայտարարել է, որ կարևոր է «պահպանել Ուկրաինայի տարածքային ամբողջականությունն ու ինքնիշխանությունը, ներառյալ Ղրիմը»: Նա նաեւ կոչ է արել «ավելի շատ ջանքեր գործադրել Ղրիմի թաթարների իրավունքները պաշտպանելու համար»` փոխանցում է «ՌԻԱ Նովոստին»:
Նա նաև խոսել է Սիրիայում իրավիճակի մասին։ «Սիրիայում հումանիտար աղետի սկզբից անցել է 10 տարի»,- նշել է Էրդողանը։ «Թուրքիան դռներ է բացել միլիոնավոր սիրիացի փախստականների առջև», ինչպես նաև «ՆԱՏՕ-ի անդամ միակ երկիրն է, որը դեմ առ դեմ պայքարել է ԻՊ-ի դեմ։ Միջազգային հանրությունը չպետք է թույլ տա, որ սիրիական ճգնաժամը շարունակվի ևս 10 տարի»,- հայտարարել է նա:
Խոսելով հոկտեմբերին Փարիզում կայանալիք կլիմայի համաձայնագրի վավերացման հնարավորության մասին` Էրդողանն ասե է, որ իր երկիրը երբեք «անտարբեր չի մնացել ոչ մի խնդրի, ճգնաժամի կամ բողոքարկման նկատմամբ»: Նրա կարծիքով` «կլիմայի փոփոխության դեմ պայքարում ամենամեծ բեռը պետք է կրեն նրանք, ովքեր առավել անխնա վնաս են հասցրել շրջակա միջավայրին և ոչնչացրել բնական ռեսուրսները»,- հայտնում է ՏԱՍՍ-ը:
Հիշեցնենք, որ Թուրքիայի ԱԳՆ-ն հայտարարել է, որ Ղրիմում Պետդումայի ընտրությունները, որոնք տեղի են ունեցել սեպտեմբերի 17-19-ը, իրավական ուժ չունեն Անկարայի համար, քանի որ երկիրը չի ճանաչում թերակղզու բռնակցումը Ռուսաստանին:
ՌԴ նախագահի մամուլի քարտուղար Դմիտրի Պեսկովը հայտարարել է, որ Կրեմլը ցավում է, որ Անկարան չի ճանաչել Ղրիմում Պետդումայի ընտրությունների արդյունքները և հույս ունի, որ թերակղզու վերաբերյալ Թուրքիայի դիրքորոշումը կփոխվի: Դաշնության խորհուրդը հայտարարել է, որ Ղրիմի ընտրությունների վերաբերյալ Թուրքիայի դիրքորոշումը պետք է դիտարկել որպես միջամտություն Ռուսաստանի ներքին գործերին:
Ղրիմը հանրաքվեից հետո դարձավ Ռուսաստանի մարզ, որտեղ մասնակիցների ավելի քան 96% -ը կողմ քվեարկեց Ռուսաստանի հետ վերամիավորման օգտին: Ռուսաստանի նախագահ Վլադիմիր Պուտինն ընդգծել է, որ Ղրիմի սեփականության հարցն ամբողջությամբ փակված է: