Շուտով կսկսվեն երկաթուղու հայկական հատվածում դաշտային աշխատանքները՝ Երասխ-Ջուլֆա-Օրդուբադ-Մեղրի-Հորադիզ երկաթուղու հատվածում, մասնավորապես՝ Մեղրիի շրջանում։
Այս մասին կառավարության նիստում հայտարարել է ՀՀ վարչապետ Նիկոլ Փաշինյանը՝ անդրադառնալով ներկայացված նախագծին, ըստ որի՝ պետք է միջոցներ հատկացվեն ՀՀ տարածքային կառավարման և ենթակառուցվածքների նախարարությանը։ Նախատեսվում է կատարել 43 կմ երկարությամբ Երասխ-Մեղրի հատվածում նախապատրաստական աշխատանքներ՝մինչ ծրագրի տեխնիկական առաջադրանքը։
«Սա շատ կարևոր իրադարձություն է։ Կցանկանայի հուսալ, որ զուգահեռաբար մենք դե յուրե կամրապնդենք 2021 թվականին Բրյուսելում և Սոչիում եռակողմ հանդիպումների ընթացքում ձեռք բերված պայմանավորվածությունները»,- ասել է վարչապետը։
ՀՀ տարածքային կառավարման և ենթակառուցվածքների նախարար Գնել Սանոսյանը նշեց, որ այս հատվածի վերլուծության արդյունքներով կսահմանվեն չափորոշիչներ, որոնց համաձայն կպատվիրվեն նախագծային աշխատանքները և կկատարվեն տեխնիկական առաջադրանքները։
«Կուսումնասիրվեն մի շարք խնդիրներ՝ թունելներ, կայաններ, ոռոգման խողովակաշարեր և այլն։ Այդ ուսումնասիրություններն իրականացնելու համար մենք պրոֆեսիոնալ թիմ ենք ուղարկում այնտեղ։ Ուրախությամբ ուզում եմ նշել, որ խմբում ընդգրկված են Ճարտարապետության և շինարարության Հայաստանի ազգային համալսարանի գիտնականներ։ Խմբի հետ աշխատելու են Հարավկովկասյան երկաթուղու մեր գործընկերները»,- ասաց Գնել Սանոսյանը։
Վարչապետի խորհրդական Արտաշես Թումանյանն ասաց, որ մարտի 4-ի առավոտյան 9 հոգանոց մասնագիտական խումբը կմեկնի Մեղրի։
Վարչապետ Նիկոլ Փաշինյանը հավելեց, որ այս ամենը դիտարկվում է «Հայկական խաչմերուկ» նախագծի շրջանակներում, և շատ կարևոր է, որ աշխատանքներ են տարվում մայրուղիների, հնարավոր երթուղիների, այդ թվում՝ նոր մայրուղիների կառուցման ուղղությամբ։