Տոկիոյի օլիմպիական խաղերի բացման արարողությունն անվանել են մռայլ և էմոցիաներից զուրկ։ Ինչպես հայտնի է` Տոկիոյում հուլիսի 23-ին տեղի ունեցավ Տոկիո-2020 օլիմպիական խաղերի բացման արարողությունը։ Դրանք հետաձգվել էին մեկ տարով` կորոնավիրուսային համավարակի կողմից աշխարհը «գերության վերցնելու» պատճառով։
68 հազար մարդ տարողունակությամբ ստադիոնում ներկա էր ընդամենը 10 հազար հանդիսատես` ներառյալ սպորտսմեններն ու լրագրողները։
Հանդիսատեսի փաստացի բացակայությունն իր հետքը թողեց միջոցառման ընդհանուր տրամադրության վրա։ Ամերիկյան և բրիտանական լրագրողները բացման արարողությունը համեմատել են թաղման հետ։ «Ինչպես թաղման ժամանակ»` գրել է FOX Sports-ը։
Ճապոնիան Երկիր մոլորակի պայծառ, խորհրդավոր և հուզիչ երկրներից մեկն է` գրել է բրիտանացի գրող և լրագրող Յան Դանթը,- և ես զարմացած եմ, որ նրանք այսպիսի բան են կազմակերպել։
USA Today-ն արարողությունն անվանել է «մեծ հիասթափություն»։
Հանդիսատեսը նշել է, որ այս արարողությունը պետք է շեղեր, այլ ոչ թե հիշեցներ աշխարհում առկա իրավիճակը։
Բացման արարողությունը սկսվել է լռության րոպեով` պանդեմիայի հետևանքով մահացած մարդկանց և 1972 թվականին Մյունխենում սպանված Իսրայելի պատվիրակության անդամների հիշատակին։