Անգլիայում բենզալցակայանների առջև երկար հերթեր էին գոյացել այն բանից հետո, երբ առաջացել են վառելիքի մատակարարման խնդիրներ, իսկ սպառողները, խուճապի մատնված, փորձում են մեքենաների բաքերը լիքը պահել։ Այս մասին հայտնում է BBC-ն։
Որոշ բենզալցակայաններ փակ են, քանի-որ վառելիքը վերջացել է:
Իշխանություններն ասում են, թե խնդիրն առաջացել է խուճապի մատնված վարորդների կողմից, այլ ոչ թե մատակարարման շղթայում խափանումների հետևանքով։
Սակայն, մատակարարող ընկերություններն այլ փաստեր են ներկայացնում։ Ճանապարհային տրանսպորտի ասոցիացիայի տվյալներով ՝ Մեծ Բրիտանիայում բեռնատար մեքենաների վարորդների թիվը 100.000 -ով պակասել է: Նշվում է, որ մատակարարման դեֆիցիտի հետ կապված խնդիրները սրվել են կորոնավիրուսային համաճարակի, ինչպես նաև Եվրամիությունից Միացյալ Թագավորության դուրս գալու (Brexit) և ԵՄ այլ երկրներից որպես վարորդ աշխատանքի եկած մարդկանց թվի նվազման պատճառով:
Բեռնատար մեքենաների վարորդների պակասը երկրում սննդի և այլ ապրանքների, ինչպես նաև վառելիքի առաքման խափանում է առաջացրել: Մեծ Բրիտանիայի սուպերմարկետների խոշորագույն ցանցերից մեկը ՝ Tesco-ն, զգուշացրել է կառավարությանը, որ դատարկ դարակների պատճառով սպառողները կարող են խուճապի մատնվել Սուրբ Ծնունդից առաջ:
Բեռնատարի վարորդների խնդիրը լուծելու համար կառավարությունը մշակում է մի ծրագիր, որը թույլ կտա օտարերկրյա վարորդներին ժամանակավոր վիզա ստանալ` Մեծ Բրիտանիայում աշխատելու համար: Սպասվում է, որ ծրագրի մանրամասները կհրապարակվեն կիրակի օրը:
Այդ նպատակով ընդգծվում է, որ ներգաղթյալների մասին օրենքում կկատարվեն ժամանակավոր փոփոխություններ։ 5000 մարդ, ով կաշխատեն որպես վարորդ, կկարողանա ստանալ ժամանակավոր վիզա:
Կառավարությունը հայտարարեց, որ նավթավերամշակման գործարաններում վառելիքի պակաս չկա և կոչ արեց խուճապի չմատնվել և անիմաստ գնումներ չկատարել։
Հաղորդվում է նաև, որ կառավարությունն աշխատում է ավելի երկարաժամկետ միջոցառումների վրա `ավելի շատ բեռնատարների վարորդներ պատրաստելու և վարորդական քննությունների արագացման համար:
BBC- ի քաղաքականության խմբագիր Վիկի Յանգն ասում է, որ ժամանակավոր վիզաների ռեժիմը ողջունելի չէ կաբինետում: Քանի որ Brexit-ից հետո ընկերություններին ասացին. «Դուք այլևս չեք կարող ապավինել էժան օտարերկրյա աշխատուժին, Դուք պետք է կենտրոնանաք երկրում աշխատուժի վրա, նրանց պատրաստեք, ավելի լավ աշխատավարձ վճարեք»: Ըստ Յանգի, ներգաղթի մասին օրենքների մեղմացումը թուլացնում է այդ հաղորդագրությունը և առաջ կբերի այլ ոլորտներում նմանատիպ պահանջների ձևավորում։
Sainsbury’s-ը, երկրի սուպերմարկետների մյուս խոշոր ցանցերից մեկը, հայտարարեց, որ բենզինի պահանջարկը «բարձր է» և հայտարարեց, որ ժամանակավորապես փակել է իր կայանների մի մասը։
BP-ն նշել է, որ 1200 բենզալցակայաններից 20-ը փակվել են։
EG Group-ը, որը շահագործում է 341 բենզալցակայան ամբողջ Միացյալ Թագավորությունում, հայտարարել է, որ սպառողների բարձր պահանջարկի պատճառով սահմանափակում է դրել վաճառվող վառելիքի վրա և մեկ մեքենային 30 ֆունտ ստեռլինգից ավելի բենզին չի վաճառում։