Գերմանիան Ուկրաինային 38,5 միլիոն եվրո կտրամադրի որպես շտապ մարդասիրական օգնություն՝ կապված փետրվարի վերջին Ռուսաստանի նախագահ Վլադիմիր Պուտինի կողմից սկսված պատերազմի առիթով։ «Մենք կօգնենք այնտեղ գտնվող փախստականներին և կանենք ամեն ինչ՝ ցույց տալու մեր համերաշխությունը», — երկուշաբթի օրը՝ մարտի 7-ին, Մոնպելյեում ԵՄ խորհրդի նիստում ասաց Տնտեսական համագործակցության և զարգացման նախարար Սվենյա Շուլցեն։
Այդ միջոցները կտրամադրվեն աղետների հետևանքով տուժածների օգնությանը և խաղաղ բնակչությանը հոգալու համար: Օգնության առաջին մասնաբաժինը արդեն ստացել է Ուկրաինայի հրշեջ ծառայությունը, հայտնել են Բեռլինի տնտեսական համագործակցության և զարգացման նախարարությունից։ 4,5 միլիոն եվրո արժողությամբ առաջին փաթեթը ներառում է, ի թիվս այլ բաների, պաշտպանիչ հագուստ, սարքավորումներ և հրշեջ ծառայության համար նախատեսված տեխնոլոգիաներ:
Բացի այդ, հնարավոր է աջակցություն ցուցաբերվի ուկրաինական քաղաքներին, որոնք ընդունում են ներքին փախստականներին։ Նրանց կտրամադրվեն գեներատորներ, ջրի տարրաներ, վրաններ։ Նախարարությունը նախատեսում է նաև մշակել Գերմանիայի և Ուկրաինայի քաղաքների միջև համագործակցության ծրագիր, որը ներկայումս ներառում է ավելի քան 70 գործընկերություն։
Նա նաև նշել է, որ Եվրահանձնաժողովն արդեն հայտարարել է Ուկրաինային 500 մլն եվրոյի չափով օգնություն տրամադրելու մասին, իսկ Գերմանիայի արտաքին գործերի նախարարության բյուջեից տրամադրվել է 37 մլն եվրո։