Հայ դպրոցականների թիմը դուրս եկավ «The Earth Prize» միջազգային բնապահպանական մրցույթի եզրափակիչ, որը կանցկացվի ԱՄՆ-ում։
«Այբ» դպրոցի 12-րդ դասարանի աշակերտներ Իլյա Լալազարյանը, Նանե Ենգիբարյանը և Մերի Շուշանյանը ներկայացնում են Հայաստանը Rene Mask բժշկական դիմակների վերամշակման նախագծով։ Նախագծի գիտական ղեկավարն է քիմիայի ուսուցչուհի Լիլիթ Համբարձումյանը։
Ընդհանուր առմամբ մրցույթին մասնակցելու հայտ է ներկայացրել 650 թիմ աշխարհի 114 երկիր ներկայացնող 516 դպրոցներից։ Եզրափակիչ փուլում հայ դպրոցականները «մրցելու են» Մեծ Բրիտանիայի, Վիետնամի, Շվեյցարիայի, Թայվանի, Կանադայի, Արաբական Միացյալ Էմիրությունների, Հարավային Կորեայի, Ջամայկայի և Քենիայի թիմերի հետ։
«Մարտի 25-ին եզրափակիչ փուլ անցած թիմերից մեկը կհայտարարվի որպես Earth Award-ի հաղթող և կստանա 100,000 դոլար մրցանակ, որը հավասարապես կբաժանվի թիմի անդամների և նրանց դպրոցի միջև»,- ասվում է գրառման մեջ։