Հոկտեմբերի 26-ին ԱՄՆ-ում ՀՀ դեսպան Լիլիթ Մակունցը հանդիպել է ԱՄՆ Կոնգրեսի Ներկայացուցիչների պալատի նախագահի օգնական, կոնգրեսական Քեթրին Քլարկին։ Քեթրին Քլարկը Կոնգրեսի Ներկայացուցիչների պալատի հատկացումների հանձնաժողովի անդամ է, որը ամենակարևոր հանձնաժողովներից է:
@armenpress-ի հաղորդմամբ՝ ԱՄՆ-ում ՀՀ դեսպանությունից հայտնում են, որ դեսպանը շնորհակալություն է հայտնել կոնգրեսականին Հայաստանին և Արցախին առնչվող հարցերում մշտական աջակցության համար։ Իր հերթին, կոնգրեսական Քլարկը բարձր է գնահատել Ամերիկայի հայկական սփյուռքի դերը երկկողմ հարաբերությունների ամրապնդման գործում։
Դեսպան Մակունցը ներկայացրել է Հայաստանում համաճարակի հետ կապված ներկա իրավիճակը, ՀՀ կառավարության ձեռնարկած միջոցառումները։
Հանդիպման ընթացքում Լիլիթ Մակունցը և Քեթրին Քլարկը քննարկել են հայ-ամերիկյան միջխորհրդարանական համագործակցության հետագա խորացմանն ուղղված հարցեր։ Քեթրին Քլարկը պատրաստակամություն է հայտնել աշխատել օրենսդիր մարմինների միջև համագործակցության խթանման ուղղությամբ: