Իրանի իշխանություններն անցած չորեքշաբթի մահապատժի են ենթարկել երեք կնոջ։ Նրանք բոլորն էլ մեղավոր են ճանաչվել իրենց ամուսիններին սպանելու մեջ։ Մահապատժի ենթարկվածներից մեկին ամուսնացրել են դեռահաս տարիքում։ Այս մասին հայտնում է Ազատություն ռադիոկայանը։
Միայն այս շաբաթ Իրանում մահապատժի 32 դատավճիռ է կայացվել։ 2022 թվականի առաջին կիսամյակում երկրում իրականացվել է ավելի քան 250 մահապատիժ՝ երկու անգամ ավելի, քան նախորդ տարվա նույն ժամանակահատվածում։
Իրանում աշխատող իրավապաշտպան կազմակերպությունները նշում են, որ իրանական դատարանները մեղմացուցիչ հանգամանքներ չեն համարում այն, որ սպանությունները կարող էին կատարվել ինքնապաշտպանության նպատակով, որ դրանց կարող էին նախորդել տարիներ շարունակ ընտանեկան բռնությունը, և որ մեղադրյալներից շատերն ամուսնացել են առանց իրենց համաձայնության։
Իրանում մահապատիժների թիվն աճում է. Համաձայն նորվեգական Human Rights in Iran (IHR) կազմակերպության և ֆրանսիական «Միասին ընդդեմ մահապատժի» (ECPM) զեկույցի՝ 2021 թվականին երկրում իրականացվել է առնվազն 333 մահապատիժ, մահապատժի ենթարկվածներից առնվազն 17-ը կանայք են եղել։ Միևնույն ժամանակ, իրավապաշտպաններն ասում են, որ մահապատիժների մասին հրապարակայնորեն հաղորդվում է դեպքերի միայն 16,5%-ում։ Մահվան դատավճիռները հաճախ նշանակվում են հանցագործությունների համար, որոնց համար երկրներից շատերը շատ ավելի մեղմ պատիժներ են նշանակում։
Ռադիոկայանը նշում է, որ մահապատժի ենթարկվածների մեջ գերակշռում են ազգային փոքրամասնությունների ներկայացուցիչները։ Օրինակ, բոլոր դատապարտվածների մոտ մեկ քառորդը պատկանում է բելուջ ժողովրդին, թեև բելուջները կազմում են Իրանի բնակչության ընդամենը 5%-ը։
Amnesty International իրավապաշտպան կազմակերպությունը մտահոգված է Իրանում վերջին տարիներին մահապատիժների թվի կտրուկ աճով։ «Պետական մեքենան զանգվածաբար սպանում է քաղաքացիներին ողջ երկրում: Սա մարդու կյանքի իրավունքի նողկալի խախտում է»,- ասել է Amnesty International-ի տարածաշրջանային տնօրենի տեղակալ Դիանա Էլթահավին: